Аан дойдутааҕы Румыния Мангалия куоратыгар ыытыллыбыт пляжка тустуу Чемпионатын боруонса мэтээл хаһаайына,

өрөспүүбүлүкэ улахан ааттаах хапсаҕайга түһүлгэлэрин хас да төгүллээх чемпиона, төрөөбүт Кэбээйи улууһун

дорҕоонноохтук ааттата сылдьар

күндү үөрэнээччибит, Ньургустаан!

Эйиигин Мукучу оҕо спортивнай оскуолатын эдэр хапсаҕайдьыттарыттан үһүс киһинэн Аан дойду ааттаах түһүлгэтиттэн кыайыы көтөллөөх кэлбиккинэн үөрэн, долгуйан туран ис сүрэхтэн эҕэрдэлиибит. Үөрэтиибитин – такайыыбытын ылынан, күүстээх үлэттэн куттаммакка, тиритэн-хорутан Албан аат ылбыккар киэн туттабыт!

Эн оскуолаҥ, дойдуҥ үүнэр кэскиллээх бөҕөстөрүгэр холобур буоллуҥ, эн суолгун салгыы бырааттарыҥ батыһыахтара диэн эрэнэбит. Ситиспиккин мүччү туппакка салҕыы сайыннараргар, дьонуҥ, учууталларыҥ, төрөөбүт улууһуҥ аатын аны да ааттата тураргар, атын омук дьонугар Саха чулуу бөҕөстөрө чахчы кыахтаахтарын көрдөрө – итэҕэтэ тураргар баҕарабыт!

Аны да саха бастыҥ оонньуутугар халбас харата чаҕылхай хапсаҕайга сүһүөҕүҥ бүдүрүйбэтин, көбүөрүҥ байанайдаах буоллун. Уйаны-хатаны быһаарсар киирсиилэргэ илииҥ эрчимнэннин, атаҕыҥ тирэхтэннин, быччыҥыҥ күүрбэтин. Көтөҕөн таһааран күөх кырсы буллартаар, албыннык хамсанан аллара сууллартаар, түөрэхтии түҥнэрэн түргэнник хамсанаар, тобуктуу түһэрэн тохтотор үгэннээр диэн алгыспытын тиэрдэбит. Баҕарабыт олох өлбөөрбөт дьүһүнүн, дьол сымсаабат амтанын, уостубат умсулҕаны, эстибэт эрчими!

Саха төрүт көрүҥнэригэр оҕо спортивнай оскуолатын коллектива.

Бэс ыйын 23 күнэ 2015 сыл