Кэтэһиилээх XXI «Манчаары оонньуулара» спартакиада Горнай улууһун Бэрдьигэстээх нэһилиэгэр өрө күүрүүлээхтик 5 күн устата ыытылынна. Быйыл 40 хамаанда 4 группаҕа арахсан күрэхтэстилэр. Уопсайа 1568 спортсмен 11 көрүҥҥэ кытынна: хапсаҕай, гиревой спорт, мас-рестлинг, ыстаҥа, хотугу уонна национальнай многоборье, буулдьанан ытыы, ат сүүрдүү, чэпчэки атлетика. Спартакиада тэрээһинэ аһыллыаҕыттан бүтүөр диэри барыта бэртээхэй. Хас биирдии спортсмен төрөөбүт улууһун ааттатар баҕа санаалаах, эрэллээх кэлбитэ. Ону таһынан тренердэрэ күүс-көмө, өйөбүл буолаллар. Тэрийэр хамыыһыйа барытын билэ-көрө, түргэнник тутта-хапта сырытта. «Саха» көрдөрөр иһитиннэрэр хампаанньа аһаҕас эфир нөҥүө дьоҥҥо-сэргэҕэ үчүгэйдик барытын көрдөрө олорбута. Кэбээйи улууһуттан спартакиадаҕа 41 бастыҥ спортсмен кытынна. Кыттааччылар бары 100% сыраларын-сылбаларын ууран туран үлэлээтилэр. Кэбээйи улууһа, уопсай хамаанда счетунан, үрүҥ көмүс призер буолла: 30 мэтээл, итинтэн 8 кыһыл көмүс, 14 үрүҥ көмүс, 8 боруонса мэтээллэр. «Манчаары оонньууларын» көрбүт-истибит көрөөччүлэр, кыттааччы, тренер санааларын билсиэҕиҥ.

Иванов Михаил Васильевич, Саха сирин үтүөлээх тренерэ: «Сахабыт сирин олимпиадатыгар, «Манчаары оонньууларыгар», Республика бары улуустара 4 сылы быһа дьарыктанан, олус күүстээх киирсиилэр аастылар. Чуолаан хапсаҕай көрүҥэр улуустар көҥүл тустууга, хапсаҕайга аан дойду таһымыгар бастыҥ көрдөрүүлээх бөҕөстөрүн киллэрдилэр. Киһи биир тыынынан көрөр, долгутар хапсыһыылара аастылар. Кэбээйи улууһун хапсаҕайын хамаандатыгар 9 бөҕөс бэркэ кытынна. 5 мэтээли улууспутугар киллэрэн, олус үчүгэй көрдөрүү буолла. Оҕолорго Васильев Олимпий (50 кг) – 3 миэстэ, Поскачин Айсен (62 кг) – 3 миэстэ, Васильев Владислав (70 кг) – 2 миэстэ. Уолаттар маҥнайгы «Манчаары оонньууларыгар» үчүгэйдик кытыннылар: Бу оҕолор спорка инникигэ кэскиллээх буолаллар, кыра эрдэхтэриттэн утумнаахтык дьарыктанан, эрчиллэн, элбэх күрэххэ кыттан турардаахтар. Улахан дьоҥҥо Семенов Иван (75 кг) – 3 миэстэ уонна Максимов Петр (65 кг) – 2 миэстэлэри ылан, кыайыыбыт-хотуубут үгүс. «Манчаары оонньууларыгар» олус элбэх спортсмен бэйэтин көрдөрөр, элбэххэ үөрэнэр. Биһиги, тренердэр, сыалбыт-сорукпут – спортсмен санаатын өрө көтөҕүү, күүһүгэр күүс эбии буолар. Ол сыалбытын иитиллээччилэрбитин кытары толордубут. «Манчаары оонньууларыгар» хапсаҕайга, статистика түмүгүнэн, бастыҥнар кэккэлэригэр киирэбит. Оҕолор кыайыыларынан-хотууларынан Кэбээйи улууһа инники миэстэҕэ турар. Утумнаах дьарыктаныы түмүгэ көрдөрүүлээх буолла. Хас биирдии күрэххэ син биир кыайыылаах уонна кыайтарыылаах баар буолар. Хас биирдии сөкүүндэ улахан оруоллаах. Кыайтаран, киһи элбэххэ үөрэнэр уонна хаһан баҕарар инникигэ утумнаахтык, күүскэ дьарыктанарга стимул буолар».    

Михайлов Максим: «Мин Бэрдьигэстээххэ ыытыллыбыт 21-с «Манчаары оонньууларын» сэргээн көрдүм. Саамай интэриэспин тарпыт көрүҥнэргэ куобах, хапсаҕай, сүүрүү киирэллэр. Атах оонньууларын, хомойуох иһин, үчүгэйдик көрбөтүм. Бу оонньууларга мин доҕотторум Дьяконов Артем, Захарова Камилла, Кейметинова Марианна, Васильев Владислав, Поскачин Айсен кыттан, улахан ситиһиилэннилэр. Кинилэр национальнай многоборьеҕа кыттыыларын дьиэнэн бары көрбүппүт. Биир дойдулаахтарбар Семенов Иваҥҥа, Максимов Петрга, Уваровский Алексейга уонна Уваровская Сайаанаҕа ыалдьыбытым. «Куобахха» Кай Адамов ыстаныытын, туттуутун-хаптыытын биһирээтим. Коронавирус ыарыыттан сылтаан, көрөөччү суоҕа хомолтолоох. «Ыалдьааччы баара буоллар, спортсменнар өссө үчүгэй көрдөрүүнү туруоруо этилэр» диэн санаалаахпын».    

Ноговицын Саша: «Манчаары оонньууларын» Саха сирэ бүттүүн кэтээтэ-манаата. Бу сахалар «Олимпийскай оонньууларбыт» буоллаҕа. Спортсменнар 11 спорт көрүҥэр туох баар күүстэринэн-уохтарынан кытыннылар. Мин бу спартакиадаҕа хапсаҕайы көрдүм. Бэйэм бу көрүҥү кыра эрдэхпиттэн олус сөбүлүүбүн. Кэбээйибит улууһуттан кыттыбыт хапсаҕайдьыттарга барыларыгар ыалдьыбытым. Чуолаан, оҕолор хапсыһыыларын көрдүм. Васильев Владигы, Поскачин Айсены, Васильев Олимпийы, Гаврильев Алексейы кытары бииргэ хапсаҕайга дьарыктаммыппыт, элбэх күрэхтэһиилэргэ кыттан турардаахпыт. Уолаттар маҥнайгы «Манчаарыларыгар» кыайыыларын көрөн баран олус үөрдүм. Маннык курдук спорду сэҥээрэ, таптыы, дьарыктана сылдьалларыгар эрэнэбин».  

Гоголева Клара Ивановна: «Кэтэһиилээх «Манчаары оонньуулара» олус түргэнник мичик гынан ааста. Дьон-сэргэ 5 күн устата спортсменнар киирсиилэрин биир тыынынан кэтээтибит. Мин спартакиада талисманнарын олус сөбүлүү көрдүм. Тэрийээччилэр оонньуу талисманнарын олус сөпкө талбыттар эбит. Оонньуу аһыыта, сабыыта уоттаах-күөстээх, киһи кутун долгутардык ааста. «Кырсаада Куо 2021» тэрээһин киһи хараҕын олус үөрдэр. Спортсмен кыргыттар эчи кэрэлэрэ, нарыннара, таҥастара-саптара мааныта наһаа астык. Сахабыт сирин аатырбыт модельера Августина Филиппова таҥастарын кэрэ аҥардар бары сэргии көрбүт буолуохтаахтар. Аны 4 сылынан спартакиада Таатта улууһугар буолар буолла, ол кэмҥэ диэри коронавирус ыарыы сүтэрэ буоллар, астына-дуоһуйа Таатта ытык сиригэр-уотугар баран, «Манчаары оонньууларын» көрүө этибит».  

Семенов Иван, «Манчаары оонньууларын» хапсаҕайга призера: – Мин «Манчаары оонньууларыгар» хапсаҕайга 75 киилэҕэ киирсибитим. Хас биирдии хапсыһыым барыларын кытары уустук этэ, чопчу киһини этэр кыаҕым суох. Өр кэтэспит маҥнайгы «Манчаарым» этэҥҥэ түмүктэннэ. 3-с миэстэ буолбутум бэйэбэр улахан кыайыы. Сыыһа туттуулар бааллар, олору көннөрүөм уонна аныгыскы оонньууларга өссө үчүгэй бэлэмнээх кэлиэм. Ол туһугар күүстээхтик дьарыктаныахха, элбэх күрэхтэһиилэргэ кыттыахха, уопуттаныахха наада».   

XXI "Манчаары оонньууларын" Саха Сирэ бүттүүн кэтээтэhttps://xn--80aaacn2d.xn--p1ai/article/17276