Бүгүн, кулун тутар 12 күнүгэр саха төрүт көрүҥнэригэр Мукучу оҕо спортивнай оскуолатыгар биир ураты күн буолла. Кэбээйи улууһун баһылыга Иван Иванович Левин уонна Кэбээйи улууһун спортка саламтатыттан Павел Алексеевич Верховцев, улуус эдэр ыччатын лидерэ Потапов Василий Петрович ыалдьыттаатылар. Иван Иванович тренердэри уонна эдэр спортсменнары Кэбээйи улууһугар физическэй культура уонна ГТО сылынан эҕэрдэлээтэ. Бу сайын ыытыллар саха төрүт көрүҥнэригэр “Манчаары оонньуулара” Спартакиада5а ситиһиилээхтик кыттар гына өссө күүскэ дьарыктаналларыгар баҕа санаатын эттэ.
Саха республикатын үтүөлээх тренеригэр, Михаил Васильевич Ивановка, үөрэнээччилэрэ Кэбээйи улууһун дорҕоонноохтук ааттата сылдьалларыттан астынарын биллэрэн махтанна уонна «За заслуги перед Кобяйским улусом» бэлиэни туттарда. Маны таһынан, сборнай хамаанда чилиэннэригэр «Ураахҥай» түмсуу салайааччыта, биир дойдулаахпыт, Тургун Попов онотторбут «Эр хоһуун буол” аҕыс спортивнай форматын бэлэх уунна.
Дьэ уонна ол кэннэ, тренер Михаил Васильевич туох албастаах, методикалаах дьарыгынан маннык үрдүк көрдөрүүлэри ситиһэрин билээри, өссө чугастык алтыһаары тиритэ-хорута оҕолорбутун кытта тэҥҥэ дьарыктаннылар. Эттэринэн-хааннарынан хапсаҕай албастарын “амсайдылар”. Озолору кытта паараза дьарыктаннылар, күөн көрсөн көрдүлэр. Ол сылдьан Монголия, республика хас да төгүллээх чемпионнарыттан, призердарыттан Владик Васильевтан уонна Сергей Николаевтан умса хоруйан көбүөргэ да төкүнүйүү баар буолла. Дьарыктан астыктык сылайа астынан, дуоһуйан бардылар.
Маны таһынан спорт саламтатын специалиһа Павел Алексеевич спортивнай оскуола докумуон өттүнэн үлэтин-хамнаһын билистэ, көрдө-иһиттэ.
Саха төрүт көрүҥнэригэр спортивнай оскуола саламтата үлэтигэр туох көмө наадатын этиннэ, суругунан туттарда.
Кэбээйи улууһугар физическэй культура уонна спорт сыла салҕанар. Бары бииргэ кыайыыларга дьулуһа айанныыбыт, чөл олоххо тардыһабыт.

Суруйда тренер Иванова С.Н.
12.03.2021 сыл