Бу үөрүүлээх тэрээһини сэргэ интернат  саҥа дьиэтин арыйыы сиэрэ-туома ыытылынна. Кэбээйи улууһун дьаһалтатын, Мукучу нэһилиэгин көҕүлээһининэн итиэннэ “Норуот күүһэ- көмүөл күүһэ”- диэн санаанан салайтаран спортоскуола уонна Танара оскуолатын эр дьонун субуотунньуктарын күүһүнэн 1 ый иһинэн 2 эргэ дьиэни көтүрэн, холбуу тутан интернат дьиэтин тутан таһаарбыттара.

Ол кэннэ урбаанньыт Иван Иванович Кононов ылынан, нэһилиэк бастыҥ ууһа Сидоров Павел Иванович салайааччылаах тутуу биригээдэтэ 2 аҥар ый иһигэр ис оҥоһуутун оҥорон бүтэрбиттэрэ. Бу күннэргэ 15 миэстэлээх интернакка  оҕолорбутун олохтоон, үөрүүбүт үксээтэ! Быйылгы үөрэх дьыла саҕаланыаҕыттан 3 ый кэриҥэ оҕолорбут ыалларынан тарҕаһан олорбуттара. Оҕолору олохтообут Мукучу сайаҕас ыалларыгар махтал бастыҥа этилиннэ.

 Интернакка олорор оҕолор төрөппүттэрэ бары кыттыһан баҕа өттүлэринэн  автомат- таҥас сууйар массыына бэлэхтээтилэр. Урут бэйэтэ эмиэ Баҕадьаттан кэлэн интернакка олорон үөрэммит, төрөппүт Кононов Николай Петрович оҕото бэртээхэй усулуобуйаҕа, ыраас, сылаас дьиэҕэ олороруттан үөрэрин уонна кинини эмиэ кыратыгар көрбүт иитээччитэ Кычкина Мария Павловна  баарыттан астынарын эттэ.

  Онон төрүт көрүҥнэринэн дьарыктанарга, олорорго усулуобуйа барыта баар буолла.  Тутуу тэрээһин өттө Мукучу нэһилиэгэ МТ,баһылык Сысоева А.И үлэлиир  кэмигэр, кини өйөбүлүнэн саҕаламмыта. Спортоскуола директора М.В.Иванов, орто оскуола директора Е.П. Эверстов, иккиэн төрүт олохтоох дьон, үлэни сөпкө аттаран, дьону көҕүлээн тутууну ыыппыттарын бэлиэтиир тоҕоостоох.  Үп-харчы өттүн Кэбээйи улууһа МТ дьаһалтата, кэмигэр көрөн тутуу харгыһа суох барбытыгар олохтоохтор төрөппүттэр бука бары махтанабыт!                                        

Ксения Новикова, Мукучу

                 $IMAGE5$