Арыылаах нэһилиэгэр бэҕэһээ, балаҕан ыйын 4 күнүгэр, Лүүчүн 110 сылынан, Кэбээйи улууһугар спорт уонна ГТО сылын чэрчитинэн спорду, үөрэҕи өрө туппут, биһиги киэн туттар уолаттарбыт, бырааттарбыт Иванов Никита, Гуляев Айтал, Никифоров Алексей сырдык кэриэстэригэр, ааттарын үйэтитэр сүҥкэн суолталаах тэрээһин буолан ааста. Ол курдук ааспыт 2020 сыл ППМИ бырагыраамматыгар киирэн, Яковлев Иван Федорович бырайыагын өйөөн, уонна нэһилиэк уопсай быһаарыныытын түмүгүнэн «Үс кут – сырдык санаа» диэн ааттаах үүнэр көлүөнэ ыччаты спортка кынаттыырга уонна нэһилиэк дьонун-сэргэтин үтүөҕэ-кэрэҕэ тардар суолталаах дьоһун площадка тутуллан үлэҕэ киирдэ.
Тэрээһин иһинэн хапсағай хабыр хапсыһыыларын күрэғэ, ону тэңэ күүстээхтэр, быһыйдар күөн күрэстэрэ "Лүүчүн Боотура 2021" буолан элбэх дьону Мукучуттан, Бағадьаттан, Мастаахтан Арыылаах кэрэ туонатыгар түмэ тарта. Манна кэлэн кытыннылар уонна көбүөрү киэргэттилэр Бастакы Лүүчүнтэн төрүттээх, саха төрүт көрүҥнэригэр Мукучу бөһүөлэгин оҕо спортивнай оскуолатын аатырар бөғөстөрө: Левчиков Владислав, Семенов Иван, Андросов Николай, Саввинов Иван.
Спонсордарынан буоллулар уолаттарбыт Никита, Айтал, Алексей аймахтара, бииргэ үөрэммит оғолоро, табаарыстара, төрөппүттэрин кытта бииргэ үөрэммиттэр, маны тэҥэ маастар уолаттарбыт: Попов Василий Алексеевич, Иванов Пётр Александрови, Семенов Иван Иванович, Николаев Пётр Дмитриевич о5олорго 25,30,40,45 ыйааһыҥҥа бастакы миэстэлэргэ 5000 уу харчыннан спонсордаабыттара уонна бэйэтин анал бирииһин 65 киилэ5э Максимов Петр Егорович туруорда.
Ытыктабыллаах ыалдьытынан буолла Бастакы Лүүчүнтэн төрүттээх, Россия үтүөлээх артыыһа, Ойуунускай аатынан Саха академическэй театр дириэктэрин солбуйааччы Анатолий Павлович Николаев.
Хапсаҕай уонна «Лүүчүн боотура-2021» күрэхтэри өрө күүрүүлээхтик, сэниэлээх сиэдэрэй куолаһынан киэргэттэ бэйэбит уолбут Эдуард Захаров. Судейство5а олордулар: Иванов Н.Д., Николаев П.Е., Левчиков К.К., Андросов Н.А., Саввинов И.Е., Левчиков В.И.
Арыылаах сэмэй, ыалдьытымсах олохтоохторун көҕүлээһининэн баай-талым остуол тэриллэн уонна площадкаҕа бэйэтигэр итии чэй уонна кофе түҥэтиллэн, айылҕабыт тыйыс тыынын билбэккэ да аастыбыт: ардаҕынан да ибииртэ, арҕааттан тыалынан да саба биэртэ. Спортсмен уолаттарбыт, араас эриирдэри билэр дьон, күүстээх хапсыһыыларын ыһыктыбатылар, кыайыыга дьулуурдарын, кытаанах санааларын сүтэрбэтилэр, оттон көрөөччүлэр оҕолорбут тустарыгар ыһыылара-хаһыылара өрө дуорайан, сэниэлэрэ өссө эбиллибиккэ дылы буолбуттара ой дуораана буолан ыраахха иһиллибитэ.
Бу курдук: 25 киилэ5э - 6 спортсмен, 30ка - 4, 40ҥа – 8, 45кэ – 3, 55кэ – 4, 62гэ – 3, эр дьоҥҥо: 65кэ– 4, 75кэ – 8 спортсмен кыттыыны ыллылар.
Оҕолорго хапсаҕай күрэҕин түмүктэрэ:
25 киилэҕэ – 1 - Софронов Вадим (Мастах), 2 - Михайлов Богдан (Баҕадьа) , 3 - Попов Эрчим (ДЮСШ)
30 киилэҕэ – Алексеев Павел (Баҕадьа), Гаврильев Алик (ДЮСШ), Павлов Саша (ДЮСШ)
40 киилэҕэ – Кононов Олег (Баҕадьа), Каримов Сулус (ДЮСШ), Жакипов Сергей (Мастаах)
45 киилэҕэ – Семенов Виталий (ДЮСШ), Дмитриев Антони (ДЮСШ), Лугинов Ваня(ДЮСШ)
55 киилэҕэ - Костя Михайлов (ДЮСШ), Иванов Дима (ДЮСШ), Мальцев Кирилл (Мастаах)
62 киилэҕэ – Поскачин Айсен (ДЮСШ), Николаев Сергей (ДЮСШ), Николаев Ваня (ДЮСШ)
Эр дьоҥҥо хапсаҕайга түмүктэр:
65 киилэҕэ – Поскачин Айсен (ДЮСШ), Николаев Сергей (ДЮСШ), Андросов Николай (ДЮСШ выпускнига).
75 киилэҕэ -Левчиков Владик, Семенов Ваня, Саввинов Ваня (ДЮСШ выпускниктара).
Абсолютнайга түмүктэр:
Абсолютнайга 40 киилэ5э диэри (14 спортсментан) Кононов Олег (Баҕадьа).
Абсолютнайга 55 киилэ5э диэри (7 спортсментан) Михайлов Константин (ДЮСШ).
Абсолютнайга 75 киилэ5э эр дьоҥҥо Левчиков Константин (ДЮСШ тренера).
Анал ааттар: “Саамай түргэн кыайыы” Алексеев Павел, “Саамай эдэр бөҕөс” Иванов Дьулуур, “Кырасыабай быраҕыы” Иванов Дима, “Кэскиллээх бөҕөс” Лугинов Алгыс, “Кыайыыга дьулуур” Жакипов Сергей. Маны таһынан спонсордартан сүрдээх элбэх анал бириистэр туттарылыннылар.
Саамай улахан киирсиилээх, өрө күүрүүлээх биэс көрүҥтэн (тутум эргиир, мас тардыһыыта, хапсаҕай, сүүрүү, тааһы көтөҕүү) аттаран биир бастыҥы, чулууну, сымсаны уонна сыыдамы быһаарар «Лүүчүн боотура-2021» 6 спортсмен уолу, ол иһигэр 4 маастары түмэ тарта. 3 миэстэни Николай Архипов (Мастаах), 2 миэстэни 11 кылаас үөрэнээччитэ Владислав Софронов (Мастаах) уонна «Лүүчүн боотура-2021» ааты эрэллээхтик сүктэ, убаһа хаһаайына буолла Семенов Иван (ДЮСШ выпускнига).
Спортивнай площадка арыллыыта Бастакы Лүүчүн аҕа баһылыга Левин Николай Иванович түүннэри-күннэри сүүрүүтүн-көтүүтүн, элбэх үлэтин өссө биир сиппит –хоппут былаана буолар.
Бу үлэҕэ киирбит «Үс кут – сырдык санаа» спортивнай площадка оҕолорбут сырдык ааттарын мэлдьи ааттата туруохтун, кэнчээри ыччаты үөрэххэ, кэрэҕэ, сырдыкка, кыайыыга, спорт киэҥ эйгэтигэр угуйа, ыҥыра туруохтун! Спорт - иннибит диэки хардыы, спорт - дьулуур, тулуур, кыайыы!
Григорьева К.Д.
ДЮСШ директоры солбуйааччы |